Readings:
Genesis 2:7–9; 3:1–7
Psalm 51:3–6; 12–14, 17
Romans 5:12–19
Matthew 4:1–11

NAMBAWAN SANDE BILONG LEN (YIA A)
SATAN I LAIK BAI YUMI GIVIM BAKSAIT LONG GOD.

“God i laik olgeta manmeri bai ol inap long kisim laip bilong em” (KKM 1). Taim bilong Len, em i gutpela taim bilong glasim na skelim olsem yumi gat dispela laip bilong God o nogat. Em i taim bilong painimaut: yumi stap klostu long God o yumi lusim em pinis bikos long sin. “Jisas i bin kam long givim yumi laip tru bilong em. Wanem samting i helpim long strongim dispela laip long yumi, em i gutpela, na wanem samting i save bagarapim na tekewe dispela laip, em i nogut” (KKM 773).

God i mekim yumi kamap olsem piksa bilong em yet. Wanpela bikpela mak bilong dispela piksa bilong God long laip bilong yumi em i pasin bilong stap fri. God yet i givim dispela strong na save long stap fri, bai “yumi ken skelim wanem samting i gutpela na wanem samting i nogut. Dispela pasin bilong skelim i stap long bel bilong yumi olgeta na yumi stap fri long bihainim ol gutpela samting na lusim ol samting nogut” (KKM 774).

“Laip bilong olgeta manmeri em i ples bilong pait namel long ol gutpela samting na ol samting nogut, na namel long lait na tudak” (KKM 773). Dispela kain pait insait long laip bilong yumi, yumi ken kolim pait bilong traim. Long namba wan rit Satan i traim laip na fridom bilong Adam na Eva. Long Gutnius tude Satan i traim Jisas. Satan i no wanbel long plen bilong God. Olsem na em i traim ol manmeri bai ol i lusim God na mekim sin. Satan i save, bilong winim ol manmeri long mekim sin, em i mas winim pastaim fridom na laik bilong ol. Em traim ol manmeri bai long laik na fri disisen bilong ol yet, ol i tok “yes” long bihainim em na mekim sin. Em i no Satan i holim gan na kilim narapela. Em i no Satan i stilim mani. Nogat. Em i han bilong man. Em i no Satan i pulap long gridi pasin na korapsen. Nogat. Em i bel bilong man. Satan i traim tasol laik na fridom bilong yumi long mekim olsem.

Yumi olgeta i pilim pinis long bel bilong yumi dispela traim bilong Satan. Tasol traim yet, em i no mak olsem Satan i winim yumi pinis. Nogat. Satan i win tru, sapos long laik na fridom bilong yumi, yumi tok “yesa” long traim bilong em. Satan i no wari long yu husat. Em i traim Jisas tu! Tasol Jisas i soim yumi hau em i bin winim dispela traim. Long taim bilong traim, Jisas i bin holim strong Tok Tru bilong God. Tok Tru bilong God i helpim yumi long winim olgeta traim bilong Satan.

Nambawan traim: Bihainim laik

Jisas i hangre; em i laik kaikai. Satan i tokim Jisas bai i wokim mirakel na bai i pinisim laik. Jisas i tokim Satan: “Tok bilong God i inap long givim laip, kaikai i nogat”.

Bel bilong yumi i laikim ol samting bilong graun. Bel i save mangal oltaim. Bel i no tok: “Inap nau; givim long narapela”. Bel bilong yumi i selfis, i no laik serim ol samting wantaim narapela. Na sapos Tok bilong God i no bosim bel, bai laik bilong bel i bosim laip bilong yumi. Bai sampela man long ples I gat planti samting na sampela bai I rabis. Bai I gat lo na orda problem.

Sampela manmeri long gavaman na long ples i ting kaikai na ol samting bilong graun em i inap long givim laip long yumi. Olsem na ol i wok hat bai ol ‘goods and services’ i kamap long ples. Tasol i nogat. Sapos Tok bilong God i no bosim laik bilong yumi bai ol ‘goods and services’ i no helpim gutpela sindaun. Bai mangal tasol i bikpela na bai pasin jeles i bagarapim sindaun long ples.

Nambatu traim: Kisim biknem
Satan i laik bai Jisas i apim nem bilong em. Bai i tokim ol manmeri ol i stap long hap bilong tempel. “Yupela i lukim mi; bai mi kalap i go daun na bai mi no bagarap”. Tasol Jisas i no kam bilong apim nem bilong em yet; em i kam bilong mekim nem bilong Papa bilog em i bikpela.

Sampela manmeri i pundaun long dispela traim bilong Satan; ol i wok long apim nem bilong ol. Ol i gat wanem nupela samting na ol i ting bai nem bilong ol i bikpela nau long ples. Na tru tumas, long ples ol samting bilong graun i inap long givim biknem long man. tasol, dispela i no tru. Samting bilong heven tasol i inap long givim biknem long yumi. God i givim dispela biknem long yumi long taim bilong baptais. Yumi pikinini bilong God. Na sapos yumi reflek long mining bilong dispela nem bai yumi luksave olsem nem bilong God i mas kamap bikpela long laip bilong yumi na nem bilong yumi i mas go daun.

Nambatri traim: Kisim pawa

Dispela traim i bikpela tru na i painim ol manmeri ol i gat wok long lukautim narapela. Papa, mama, pris, tisa, sista, kateket, kaunsel, etc. ol i inap long pundaun long dispela traim. Bai ol i strik tru oltaim na bai ol i kros kwik sapos narapela i no harim tok bilog ol. Bai ol i no inap long wok gut wantaim narapela. Na sapos narapela i mekim kainkain kranki toktok long ol bai ol i kros nogut o bai ol i risain.

Dispela pasin i kamap olsem: bipo, taim ol i liklik pikinini, papamama i strik tumas long ol; ol i no tok tenkyu long ol na ol i kritisaisim ol oltaim. Rong bilong papamama bipo, i givim hevi long ol nau. Tasol, sapos ol i luksave long dispela na ol i pogivim papamama, bai pasin bilong ol i ken senis.

Yumi ken daunim strong bilong Satan na traim bilong em, long taim yumi mekim wok penans na wok marimari, long pasin bilong pre, na moa yet long taim yumi tanim bel na go long kompesio na kamap wanbel wantaim God na wantaim ol bratasusa. Astingting bilong Lenten message bilong Pop Francis long dispela yia i olsem: “Mipela i save autim tok bilong Krais yet long olgeta man, na mipela i tolim ol olsem, ‘Moabeta yupela lusim pasin birua na kamap wanbel wantaim God” (2Kor 5:20).

Dia ol brata na sista, dispela taim bilong Len em i gutpela taim bilong yumi olgeta long tanim bel na kamap wanbel wantaim God na wantaim ol bratasusa. Em i taim bilong putim yau long Tok bilong God na mekim ol wok bilong marimari. Sapos yumi putim yau gut bai yumi redi long selebretim Jisas i win long sin na indai, taim em i kirap, na em i laik redim Sios long em bai i kam bek. Yumi no ken westim taim bilong Len, em i gutpela taim bilong tanim bel.

Yumi askim dispela long pre bilong Santu Maria. Em i bin ekspiriensim bikpela marimari bilong God, na em yet i tokaut long daunpasin bilong em (Luk 1:48) na kolim em yet wokmeri bilong God (Luk1:38). Long dispela misa yumi pre bai God, Papa bilong yumi, i sambai long mipela long taim bilong traim.