Easter 2020 | The Pomio Catholic Community

Given in Tokpisin at the Sacred Heart Cathedral Vunapope.

SANDE 6 BILONG ISTA (A)

Olsem wanem wanpela i ken save olsem narapela i laikim em? Wanem samting i soim olsem wanpela i laikim narapela? Hau papa i save olsem pikinini i laikim em? Hau pikinini i soim laikpasin i go long mama? Hau yumi ken soim long God olsem yumi laikim em tru? I gat wanpela rot tasol na i gat wanpela tes tasol bilong painimaut olsem yumi laikim narapela o nogat. Dispela rot na tes em i pasin bilong harim tok. Long Gutnius tude Jisas i tok: “Man o meri i kisim lo bilong mi na i bihainim gut, dispela man o meri i laikim mi tru” (Jo 14; 21).

Planti taim Jisas i bin skulim ol manmeri long pasin bilong laikim. Em i bin tok long pasin bilong sori na marimari long narapela. Em i bin tok long pasin bilong helpim na pogivim narapela. Em i tok long pasin bilong daunim yumi yet na kam klostu long narapela. Gutnius bilong em i pulap tru long dispela gutpela tok. Na moa yet. Jisas i no bin lusim yumi wantaim gutpela tok tasol. Nogat. Long laip bilong em yet, em i bin soim oltaim dispela pasin bilong laikim narapela. Em i bin mekim orait ol sikmanmeri, em rausim ol spirit nogut long ol na pogivim ol sin bilong ol.

Wanem samting moa Jisas i bin mekim long soim olsem pasin bilong laikim i pulap tru long laip bilong em? Em i soim pasin bilong harim tok bilong Papa. Yes, em i bin harim tok inap long mak bilong indai antap long diwai kros. Na long dispela pasin, diwai kros i kamap mak stret bilong laikim bilong Jisas.

Em i isi tru long tokaut long pasin bilong laikim narapela, tasol em i hatwok tru long soim dispela pasin long ol. Planti pikinini i tok, ol i laikim papa na mama. Tasol yet, ol i mekim tupela i krai. Planti man i tok, ol i laikim meri bilong ol. Tasol yet, ol i paitim ol nogut tru.

Jisas i bin givim yumi lo bilong God. Em i tokim yumi long kisim na bihainim, bikos dispela lo tasol i rot bilong bringim laikpasin namel long yumi. Tasol sampela taim em i hat long bihainim olgeta lo bilong God. Sampela taim, samting Jisas i askim yumi long mekim em i no isi. Yes, em i no isi. I no gat wanpela taim Jisas i tok olsem pasin bilong harim tok bilong Papa na bihainim em bai kamap isi. Lukim diwai kros bilong Jisas.

Laikpasin em i ofa yumi save givim long God long taim yumi kisim na bihainim olgeta lo bilong em.

Long Gutnius bilong dispela Misa Jisas i tok olsem: “Sapos yupela i laikim mi tru, orait yupela bai i bihainim gut ol tok bilong mi. Na bai mi askim Papa, na em bai i givim yupela narapela Helpim bilong strongim yupela … Dispela Helpim em i Spirit bilong tok tru” (Jon 14:15-16).

Holi Spirit i laik strongim yumi long rausim olgeta samting i bagarapim laip bilong yumi. Holi Spirit i laik helpim yumi bai yumi no lus tingting long spiritual sait bilong laip bilong yumi. Laip bilong yumi i gat tupela hap: laip bilong bodi na laip bilong sol: laip bilong graun na laip bilong heven. Na spirit nogut i laik paulim tingting bilong yumi bai yumi givim baksait long spiritual sait bilong laip bilong yumi; bai yumi lukautim tasol bodi bilong yumi; bai yumi ting ol samting bilong graun i as bilong gutpela laip bilong yumi.

Sapos ol samting bilong graun i as bilong gutpela laip bilong yumi sampela taim samting nogut bai kamap long laip bilong yumi. Taim dispela samting bai i kamap, yumi nidim narapela samting yet. Yumi nidim Holi Spirit.

Holi Spirit i save strongim yumi long stap pas wantaim Sios. Holi Spirit i givim yumi long pawa bilong sanap wantaim Jisas Krais. Ol Aposel bilong Jisas Krais i bin stap olsem ol man nating tasol; na taim Jisas i bin kirap gen ol dispela aposel i bin prêtim yet ol lida bilong ol Juda. Tasol, taim dispela Holi Spirit i bin kam daun long ol aposel long Pentekos, ol aposel ino bin prêt moa. Bilip bilong ol aposel i bin strong tru, na olsem ol i go na telemautim Tok bilong God long olgeta manmeri na soim pasin Kristen long ol.

Dia ol brata na sista, yumi noken prêt long bihainim gut tok bilong Krais. Yumi mas sanap strong long bilip na soim dispela bilip insait long famili na long ol lain bilong yumi, long ples, long skul, na long ples bilong wok … dispela i min, yumi i laik tru long kamap disaipel bilong Jisas Krais.

Mi laik pinisim skul bilong mi, wantaim wanpela pre yumi painim long Yumi Lotu Buk:

“Jisas, mi laik stap gutpela Kristen oltaim. Mi laik bihainim Kristen pasin long lotu na long ples bilong mi. Mi laik kamap olsem gutpela wit i gro insait long ples bilong mi na mi laik helpim Kristen komuniti bilong mi na ol wok manmeri bilong Sios long ol wok bilong lotu. Mi laik tokaut tu long ol arapela manmeri long lotu bilong yu, bai ol i ken save gut long en, na ol i ken kamap gutpela Kristen. Jisas, helpim mi long Spirit bilong yu”. AMEN!

+Francesco Panfilo, SDB
Archbishop of Rabaul

Homily given at Mass at the Sacred Heart Cathedral Vunapope in Tokpisin.

SANDE BILONG MARIMARI (2020)
Long Gutnius tude, “Ol disaipel i pret long ol Juda” na ol i mekim wanem? Ol i hait. Sampela bilong ol olsem Tomas i hait moa yet! Em i lusim ol na i go stap wanpis!

Pasin bilong pret, em i no nupela samting long laip bilong yumi. Kain kain samting i save mekim yumi pret. Yumi save pret long tudak, long paia, long strongpela win, long graun i guria, long tait bilong wara, long pait, long posin, long ol raskol na long planti narapela samting, na long dispela taim yumi save pret long coronavirus. Planti taim dispela pret pasin i strong tumas na i pasim yumi olsem ol kalabus. Tingting i pas; no gat amamas; yumi no sindaun gut wantaim narapela na yumi pilim olsem yumi stap wanpis.

Long Gutnius tude yumi lukim ol disaipel ol i pret tu. Ol i pret long ol Juda. Nogut ol i kam, kalabusim ol na kilim ol olsem ol i bin kilim Jisas. Olsem na ol i pasim dua bilong haus. Pret i mekim, na ol i no inap mekim wanpela samting. Ol i stap nating long haus tasol. Tasol sapos ol i stap olsem, hau bai ol narapela manmeri i save long Gutnius bilong Jisas? Husat bai tokaut long tok tru? Jisas i no laik lusim ol disaipel olsem, bai ol i pret i stap. Nogat. Em i kam, sanap namel long ol. “Na em i tokim ol olsem, ‘Bel bilong yupela i ken i stap isi.’” Em i kam bilong strongim bel na tingting na bilip bilong ol.

Jisas i no kam bek na i pinisim samting i bin pretim ol disaipel. Nogat. Ol lain Juda i stap yet ausait long dua. Ol samting i bin pretim ol i stap yet. Tasol Jisas i putim nupela samting insait long bel bilong ol disaipel. “Em i winim win bilong em i go long ol, na i tokim ol olsem, ‘Yupela kisim Holi Spirit” (Jon 20:22). Em nau! Samting ol i pulap nau long en, em i Holi Spirit. Bikpela tokaut bilong Ista em i dispela tok bilong Jisas: “Bel bilong yupela i ken i stap isi.” Jisas i no tok bai em i pinisim olgeta samting i save pretim yumi. Nogat. Yumi bai pret yet long kain kain samting. Tasol long olgeta ples we Jisas i kam, na long olgeta husat i bihainim em, em i save givim nupela strong, em i givim Holi Spirit.

Bilong wanem ol manmeri i save pret? Long nambawan pas bilong Santu Jon, em i tok: “man i save laikim ol narapela i no save pret. Sapos pasin bilong laikim ol arapela i kamap strong pinis insait long laip bilong wanpela man, orait, dispela i save rausim pasin bilong pret … Sapos wanpela man i pret, orait yumi ken save, pasin bilong laikim ol arapela i no kamap strong yet long laip bilong em” (1Jon 4:18).

Lo bilong laikim, Jisas i givim long Gutfonde nait, i marasin tru bilong rausim pret bilong yumi. Pasin laikim tasol i mekim Jisas i no pretim ol hevi em i bin bungim long GutFraide na olsem em i bin kisim bek yumi.

Taim ol Farisi i askim Jisas long wanem lo i namba wan em i tokim ol: “Yupela i mas laikim God, Bikpela bilong yumi … Na namba tu lo i wan kain olsem dispela. Em i olsem, yu mas laikim ol wan tok olsem yu laikim yu yet” (Mt 22:37-39).

Em tru, yumi no save wanem samting bai kamap yet long laip bilong yumi. Yumi lukim planti senis na nupela samting long ples na yumi pret bikos yumi no save, ol dispela samting em i gutpela o nogat? Sampela taim yumi pilim olsem: mobeta yumi pasim dua na sindaun isi tasol insait long haus.
Na olsem, pasin laikim na marimari bai rausim pret na olsem yumi ken sitdaun gut insait long famili na sosaiti. Jisas i kirap bilong givim bel isi na sekan bilong em long yumi. Na laikim bilong Jisas long yumi i unconditional. Dispela i min, em i laikim yumi maski yumi tu i laikim em o no gat, dispela i no stopim laikim bilong em long yumi. Bikpela Jisas i kam na i tokim yumi tude gen olsem: “Bel bilong yupela i ken i stap isi.”

Tude yumi selebretim Sande bilong Marimari.

Jisas yet i bin tokim Santu Faustina bai Sios i makim dispela pestode long Namba Tu Sande bilong Ista. Jisas i tokim Faustina olsem: “Mi laik bai dispela Pestode i olsem wanpela de bilong helpim olgeta manmeri, tasol moa yet long ol dispela lain pipel i mekim bikpela sin na stap longwe tru long mi. Long dispela de dua bilong marimari i stap op olgeta, solwara bilong marimari bilong mi i redi long kapsait long ol husat i kam klostu long mi. Man o meri i go long konpesio na i kisim Santu Komunio long dispela de, em bai kisim pogiv bilong ol sin bilong em na olgeta strafe ol dispela sin i bin kamapim. Ol pipel i no ken pret long kam klostu long mi, maski ol sin bilong ol i bikpela tru. Pestode bilong Marimari bilong mi i bin kamap long lewa bilong mi, bilong helpim na givim amamas long olgeta pipel.”

“Namba wan wok bilong Katolik Sios long olgeta taim, na moa yet long taim bilong nau bilong coronavirus, em i olsem: skulim ol manmeri long Marimari bilong God i pulap tru long Jisas Krais. Dispela Marimari em i as tru bilong laip bilong Sios, olsem komuniti bilong ol bilipmanmeri. Dispela laip em i narakain long laip bilong dispela graun na em i bihainim narapela kain lo. Dispela Marimari bilong God i kamap ples klia long indai na kirap bilong Jisas. Sios i mas bihainim dispela Marimari bilong God long kain kain we bilong mekim dispela graun na ol pipel i kamap moa gutpela. Olgeta taim Sios i mas mekim prea, tasol moa yet nau long taim bilong hevi na wari na kain kain senis. Kain kain hevi i mekim ol pipel i pret na bagarap. Olsem na ol i mas tanim i go long Marimari bilong God long kisim strong na lait” (John Paul II Dives in Misericordia).

Long kantri bilong yumi na long Province bilong yumi planti samting i stap gutpela, tasol i gat planti samting i no stret, olsem pasin bilong kros, na vaiolens, na abyusim ol pikinini, na lusim ol famili na pikinini na maritim narapela man o meri, na pasin korapsen. Tasol, “God em i pulap long marimari” bikos em i laik sevim yumi olgeta long pawa bilong sin na bungim yumi olsem wanfamili bilong em.

Yumi katolik i mas kamap gutpela witnes bilong marimari, namel long yumi yet na wantaim ol narapela manmeri. Pop Fransis, i tok save long yumi olsem, “i no gat wanpela manmeri i stap ausait long marimari bilong God … na Sios i olsem haus i save welkamim olgeta manmeri na i no laik long lusim wanpela. Dua bilong Sios i op i stap, olsem bai husat i gat experiensim grasia bilong God, ol inap long painim marimari bilong em. Em i tru, sin em i bikpela samting, tasol bikpela moa em i pasin bilong Sios i laik soim laikpasin (love) long husat i tanim bel”.

Tude, long planti haus lotu long olgeta hap bilong graun, yumi ken lukim piksa bilong “Marimari bilong God”. Long planti ples, Katolik manmeri i holim rosari na i save beten “Korona bilong Marimari”. Wanpela bikpela tok i save bungim yumi wantaim long dispela pre, em i olsem: “Jisas Mi Trastim Yu”. Amen!

+ Francesco Panfilo, SDB
Archbishop of Rabaul