Category Archives: Readings at Mass

Easter, Holy Mass, Homilies, Readings at Mass

Archbishop Francesco Panfilo’s Homily on Pentecost Sunday 2020 [Tokpisin]

Image
Archbishop Francesco Panfilo SDB, Archbishop of Rabaul.

SANDE BILONG PENTEKOS: Pulim win. (Jo 20:19-23)

Olgeta samting i gat laip hia long graun i save pulim win. Yumi stap laip hia long graun bikos yumi save pulim win i go i kam. Sapos yumi no pulim win, yumi bai dai. Long taim yumi pulim win, win i go insait long bodi bilong yumi na i kamap hap bilong yumi stret. Maski yumi slip o yumi mekim sampela wok, yumi no inap lus tingting long dispela pasin bilong pulim win. Win long tok ples Latin ol i kolim Spirit. 

Pestode bilong Pentekos, em i pulap tru long win, win bilong God. Long Gutnius bilong dispela Misa, yumi bin harim, taim Jisas i kirap long matmat na i kamap long ol aposel, em i lukim ol, ol i stap olsem daiman. No gat laip. No gat amamas. No gat strong. Ol i pret na ol i stap nating insait long haus. Yumi ken tok olsem: ol i sotwin. Sotwin long gutpela na stretpela tingting. Sotwin long pasin bilong bel isi. Sotwin long amamas na strong. Ol i sot long win! Olsem na taim Jisas i lukim ol, em i “winim win bilong en i go long ol, na i tokim ol olsem ‘Yupela kisim Holi Spirit’” (Jo 20:22). 

Na bihain, olsem yumi harim long nambawan rit, long de bilong Pentekos stret, “wantu wanpela nois i kamap long heven, em i olsem krai bilong strongpela win, na pulapim tru dispela haus ol i sindaun long en…. Na Holi Spirit i pulap long olgeta dipela manmeri” (Ap 2: 2 + 4). Holi Spirit em i win bilong God. Em i win bilong nupela laip.

Tude, planti samting bilong dispela graun i save pretim yumi na i mekim yumi sotwin stret long laip. Sampela taim, hevi na wari na ol kain pasin nogut long ples i bikpela tru, olsem na yumi sindaun nating tasol na lukluk i stap. Yumi pilim olsem: yumi sot olgeta long strong na amamas, yumi sot olgeta long gutpela tingting na stretpela pasin. Yumi no stap orait, bikos yumi sot long win. Yumi nidim stret nupela win, win bilong God! Yumi nidim Jisas bai em i winim win bilong em gen tude long yumi olgeta! Long mak bilong bodi, yumi save pulim win bai yumi gat laip. Long mak bilong sol, yumi mas pulim Holi Spirit bai yumi gat laip bilong God. 

Tude yumi bung wantaim long selebretim Sakramen bilong Baptais na sampela bilong ol dispela kandidet bai kisim Sakramen bilong Kompirmasio tu. Long strong bilong Holi Spirit, God i pas tru wantaim ol. Holi Spirit i mekim ol i kamap pikinini bilong God. 

Katekismo bilong Karolik Sios i tok olsem: “Sapos yumi bihainim tru tingting bilong Holi Spirit, isi isi ol mak bilong Spirit i kamap ples klia long laip bilong yumi olsem: pasin bilong laikim tru ol arapela, pasin bilong amamas, pasin bilong i stap bel isi, pasin bilong i no belhat kwik na pasin bilong helpim ol manmeri na mekim gutpela pasin long ol, na pasin bilong wokabaut stret oltaim, na pasin bilong i stap isi, na pasin bilong daunim laik bilong olpela bel”  (Ga5:22) (KKM 200). Pulim nupela win strong!

Sapos, Holi Spirit ino stap insait long yumi, bai ol kain samting olsem i kamap: “Pasin pamuk na pasin doti na pasin bilong bel i kirap long mekim ol pasin nogut, na pasin bilong lotu long ol giaman god na pasin bilong mekim olkain posin na pasin birua na belhat na kros na bel nogut na mangal na pasin bilong tingting long yu yet tasol na tok pait na brukim lain, na pasin bilong bel kaskas long ol man i stap gut na pasin bilong spak na hambak na singaut bikmaus nabaut, na ol kain kain pasin olsem”.

Long Baptais na long Konpirmasio, Holi Spirit i save strongim yumi long stap na pas wantaim Sios. Holi Spirit i givim yumi long pawa bilong sanap strong bilong witnesim Jisas Krais long laip bilong yumi. Ol Aposel bilong Jisas Krais i bin stap olsem ol man nating tasol na taim Jisas i bin kirap gen ol dispela aposel i bin prêtim yet ol lida bilong ol Juda. Tasol, taim dispela Holi Spirit i bin kam daun long ol aposel long Pentekos, ol aposel ino bin prêt moa. Bilip bilong ol aposel i bin strong tru, na olsem ol i go telemautim Tok bilong God long olgeta manmeri na soim pasin Kristen long ol.

Holi Spirit tasol i ken helpim yumi long luksave long plen bilong marmari bilong God long yumi; Holi Spirit tasol i ken givim strong long yumi bai yumi bihainim Krais. Yumi pre bai Holi Spirit i ken kapsaitim ol presen bilong em antap long yumi olgeta na moa yet antap long ol dispela pikinini bai oltaim na long olgeta ples, yumi i ken stap ol gutpela disaipel bilong Jisas.

“Bikpela, salim Spirit i kam, na mekim graun i kamap nupela gen … Kam, Holi Spirit, na pulimapim hat bilong yumi na kirapim tru bel bilong yumi long laikim ol arapela manmeri”. AMEN! 

Holy Mass, Homilies, Readings at Mass

The Homily of His Grace Archbishop Francesco Panfilo SDB at Mass for the SIXTH SUNDAY IN EASTER – Sunday 17th May 2020.

Gallery

Given in Tokpisin at the Sacred Heart Cathedral Vunapope.

SANDE 6 BILONG ISTA (A)

Olsem wanem wanpela i ken save olsem narapela i laikim em? Wanem samting i soim olsem wanpela i laikim narapela? Hau papa i save olsem pikinini i laikim em? Hau pikinini i soim laikpasin i go long mama? Hau yumi ken soim long God olsem yumi laikim em tru? I gat wanpela rot tasol na i gat wanpela tes tasol bilong painimaut olsem yumi laikim narapela o nogat. Dispela rot na tes em i pasin bilong harim tok. Long Gutnius tude Jisas i tok: “Man o meri i kisim lo bilong mi na i bihainim gut, dispela man o meri i laikim mi tru” (Jo 14; 21).

Planti taim Jisas i bin skulim ol manmeri long pasin bilong laikim. Em i bin tok long pasin bilong sori na marimari long narapela. Em i bin tok long pasin bilong helpim na pogivim narapela. Em i tok long pasin bilong daunim yumi yet na kam klostu long narapela. Gutnius bilong em i pulap tru long dispela gutpela tok. Na moa yet. Jisas i no bin lusim yumi wantaim gutpela tok tasol. Nogat. Long laip bilong em yet, em i bin soim oltaim dispela pasin bilong laikim narapela. Em i bin mekim orait ol sikmanmeri, em rausim ol spirit nogut long ol na pogivim ol sin bilong ol.

Wanem samting moa Jisas i bin mekim long soim olsem pasin bilong laikim i pulap tru long laip bilong em? Em i soim pasin bilong harim tok bilong Papa. Yes, em i bin harim tok inap long mak bilong indai antap long diwai kros. Na long dispela pasin, diwai kros i kamap mak stret bilong laikim bilong Jisas.

Em i isi tru long tokaut long pasin bilong laikim narapela, tasol em i hatwok tru long soim dispela pasin long ol. Planti pikinini i tok, ol i laikim papa na mama. Tasol yet, ol i mekim tupela i krai. Planti man i tok, ol i laikim meri bilong ol. Tasol yet, ol i paitim ol nogut tru.

Jisas i bin givim yumi lo bilong God. Em i tokim yumi long kisim na bihainim, bikos dispela lo tasol i rot bilong bringim laikpasin namel long yumi. Tasol sampela taim em i hat long bihainim olgeta lo bilong God. Sampela taim, samting Jisas i askim yumi long mekim em i no isi. Yes, em i no isi. I no gat wanpela taim Jisas i tok olsem pasin bilong harim tok bilong Papa na bihainim em bai kamap isi. Lukim diwai kros bilong Jisas.

Laikpasin em i ofa yumi save givim long God long taim yumi kisim na bihainim olgeta lo bilong em.

Long Gutnius bilong dispela Misa Jisas i tok olsem: “Sapos yupela i laikim mi tru, orait yupela bai i bihainim gut ol tok bilong mi. Na bai mi askim Papa, na em bai i givim yupela narapela Helpim bilong strongim yupela … Dispela Helpim em i Spirit bilong tok tru” (Jon 14:15-16).

Holi Spirit i laik strongim yumi long rausim olgeta samting i bagarapim laip bilong yumi. Holi Spirit i laik helpim yumi bai yumi no lus tingting long spiritual sait bilong laip bilong yumi. Laip bilong yumi i gat tupela hap: laip bilong bodi na laip bilong sol: laip bilong graun na laip bilong heven. Na spirit nogut i laik paulim tingting bilong yumi bai yumi givim baksait long spiritual sait bilong laip bilong yumi; bai yumi lukautim tasol bodi bilong yumi; bai yumi ting ol samting bilong graun i as bilong gutpela laip bilong yumi.

Sapos ol samting bilong graun i as bilong gutpela laip bilong yumi sampela taim samting nogut bai kamap long laip bilong yumi. Taim dispela samting bai i kamap, yumi nidim narapela samting yet. Yumi nidim Holi Spirit.

Holi Spirit i save strongim yumi long stap pas wantaim Sios. Holi Spirit i givim yumi long pawa bilong sanap wantaim Jisas Krais. Ol Aposel bilong Jisas Krais i bin stap olsem ol man nating tasol; na taim Jisas i bin kirap gen ol dispela aposel i bin prêtim yet ol lida bilong ol Juda. Tasol, taim dispela Holi Spirit i bin kam daun long ol aposel long Pentekos, ol aposel ino bin prêt moa. Bilip bilong ol aposel i bin strong tru, na olsem ol i go na telemautim Tok bilong God long olgeta manmeri na soim pasin Kristen long ol.

Dia ol brata na sista, yumi noken prêt long bihainim gut tok bilong Krais. Yumi mas sanap strong long bilip na soim dispela bilip insait long famili na long ol lain bilong yumi, long ples, long skul, na long ples bilong wok … dispela i min, yumi i laik tru long kamap disaipel bilong Jisas Krais.

Mi laik pinisim skul bilong mi, wantaim wanpela pre yumi painim long Yumi Lotu Buk:

“Jisas, mi laik stap gutpela Kristen oltaim. Mi laik bihainim Kristen pasin long lotu na long ples bilong mi. Mi laik kamap olsem gutpela wit i gro insait long ples bilong mi na mi laik helpim Kristen komuniti bilong mi na ol wok manmeri bilong Sios long ol wok bilong lotu. Mi laik tokaut tu long ol arapela manmeri long lotu bilong yu, bai ol i ken save gut long en, na ol i ken kamap gutpela Kristen. Jisas, helpim mi long Spirit bilong yu”. AMEN!

+Francesco Panfilo, SDB
Archbishop of Rabaul